Хөөвгөр жаахан үр минь ээ

Харахаар хайр хүрмээр хамаг бүхэн нь ариухан
Бодохоор мишээл төрмөөр бээвэг төрх нь хөөрхөн
Сонсохоор сэтгэл уярмаар шулганаа дуу нь содхон
Санахаар бодол догдолмоор тунгалаг нүд нь тодхон

Хамаг бүхэн нь хайр хүрмээр
Хөөвгөр жаахан үр минь ээ

Үнэрлэмээр дэндүү ариухан сөөвгөр зөөлөн сэвлэгтэй
Тэвэрмээр дэндүү хөөрхөн тэнтгэр жаахан биетэй
Баримаар дэндүү энхэрхэн булбарай жаахан гартай
Өхөөрдмөөр дэндүү хөөрхөн өмгөр жаахан амтай

Хамаг бүхэн нь хайр шингэсэн
Хумбарай жаахан үр минь ээ

Ухаарч нэг уужирмаар ариухан бүхнийг агуулсан
Уужирч нэг тайвширмаар сайхан бүхнийг сануулсан
Уярч нэг дуулмаар тэнгэрлэг бүхнийг тэвэрсэн
Умгар жаахан үр минь дээ

Бүүвэй бүүвэй бүүвэй

Үглээ жаахан болжмор шиг ээ
Шулганаа жаахан үр минь ээ
Бүүвэй бүүвэй бүүвэй

Эрх жаахан ишиг шиг ээ
Эрэвгэр жаахан үр минь ээ
Бүүвэй бүүвэй бүүвэй

Тэнцээ жаахан унага шиг ээ
Тэнтгэр жаахан үр минь ээ
Бүүвэй бүүвэй бүүвэй

Бяцхан жаахан хурга шиг ээ
Бээвэг жаахан үр минь ээ
Бүүвэй бүүвэй бүүвэй